د لغمان محلي مسوولان وايي چې دغه ولایت کې د یوه کور چت پرېوتو له کبله د یوې کورنۍ اووه غړي مړه شوي او یوه کوچنۍ نجلۍ ټپي شوې ده.
د لغمان د طبیعي پېښو پر وړاندې د مبارزې رییس خيرمحمد غازي وايي چې پېښه د یاد ولایت اړوند په الیشنګ ولسوالي کې رامنځته شوې ده.
د نوموړي په وینا، پېښه کې د یوې کورنۍ اووه غړي مړه شوي او یوه ماشومه ټپي ده. پېښه بېګاه شپه دوه بجې د الیشنګ ولسوالي په قلعتک کلي کې شوې ده.
د لغمان د طبیعي پېښو پر وړاندې د مبارزې رییس همداراز زیاتوي چې دې پېښه کې د شېرزاد په نوم کس له خپلې مېرمنې او پنځو زامنو سره یوځای مړه شوي او د دې کورنۍ یوازې یوه کوچنۍ نجلۍ ژوندۍ پاتې ده.
سلاموطندار پر ټویټر هم وڅارئ
تراوسه د یاد کور د چت پرېوتو اصلي لامل نه دی روښانه شوی، خو له دې وړاندې ورته پېښې د سختو اورښتونو، زلزلو او زړو کورونو له امله رامنځته شوي دي.
