د کرېکټ نړیوالې شورا له لوري د نارینهوو د نړیوالو شل اووره سیالیو په اعلان شوې تازه درجه بندۍ کې د افغانستان د کرېکټ ملي لوبډلې درې توپاچوونکي په لس غوره لوبغاړو کې راغلي دي.
د افغانستان د کرېکټ ملي لوبډلې لوبډلمشر د پاکستان پر وړاندې په شارجه کې د شل اووه سیالیو د لوبلړۍ له ګټلو وروسته په اعلان شوې تازه درجه بندۍ کې لومړی مقام ترلاسه کړی دی.
د کرېکټ نړیوالې شورا د معلوماتو له مخې، راشدخان د ۷۱۰ امتیازونو په ترلاسه کولو سره د شل اووره نړیوالو سیالیو د توپاچوونې په برخه کې لومړی ځای خپل کړی دی.
د اعلان شوې تازه درجه بندې پر بنسټ د افغانستان بل چټک توپاچوونکي فضلالحق فاروقي په ۶۹۲ امتیازونو سره درېیم او مجیبالرحمن هم اتم ځای ترلاسه کړی دی.
د سریلانکا د کرېکټ ملي لوبډلې توپاچوونکی وننډو هسرنګا بیا له راشدخان وروسته په تازه درجه بندۍ کې دویم ځای کې دی.
د کرېکټ نړیوالې شورا د شل اووره سیالیو د الرونډرانو په تازه اعلان کړې درجه بندۍ کې د ملي لوبډلې مخکیني لوبډلمشر او اوسني لوبغاړي محمدنبي درېیم مقام خپل کړی دی. محمدنبي د ۲۳۰ امتیازونو په لرلو درېیم ځای کې دی.
شکېبالحسن یو ځل بیا د نړیوالو شل اووره سیالیو لومړی الرونډر، د هند هارډک پانډیا بیا له محمدنبي مخکې په ۲۵۰ امتیازونو دویم ځای خپل کړی. شکېبالحسن ۲۶۵ امتیازونه لري.
په ورته مهال د شل اووره سیالیو په توپوهنه کې بیا هندي لوبغاړي سوریا کومار یاډوف په ۹۰۶ امتیازونو لومړی، پاکستاني لوبغاړي محمدرضوان دویم او د نیوزیلنډ پیلیز لوبغاړي ډېوېډ کانوې درېیم ځای ترلاسه کړی دی.
سلاموطندار پر ټویټر هم وڅارئ
د شل اووره سیالیو د توپوهنې په تازه اعلان شوې درجه بندۍ کې بیا په لسو غوره لوبغاړو کې د افغانستان کوم توپوهونکی نه تر سترو کېږي.
