چارواکو نن یکشنبه د مرغومې ۲۵مه رسنیو ته ویلي، دغه مسافر وړونکې الوتکه له پلازمېنې کټمنډو څخه پوکارا ښار ته روانه وه او هوايي ډګر کې له کېښناسو مخکې لوېدلې او اور یې اخیستی دی.
په ورته مهال د نیپال د پوځ یوه ویاند کرشنا بهنډاري په یوه بیان کې ویلي، د پېښې سیمې ته د ژغورنې ډلې رسېدلي او د پاتیو جسدونو د رااېستلو عملیات روان دی. نوموړي زیاته کړې چې الوتکه «ټوټې ټوټې شوې» او په وینا یې د نورو جسدونو د موندنې هڅې روانې دي.
بلخوا د یېټي «YETI» هوايي شرکت مسوولانو بیا ویلي چې الوتکه کې ۷۲ کسان سپاره وو چې ۶۸ یې مسافر او څلور یې عمله وو. د دغه هوايي شرکت د مسوولانو په وینا، الوتکې د بېلابېلو هېوادونو اتباع هم لېږدول.
سلاموطندار پر ټویټر هم وڅارئ
د یادې مسافر وړونکې الوتکې له لوېدو وروسته د نیپال لومړي وزیر بېړنۍ ناسته رابللې او له حکومتي ادارو یې غوښتنه کړې چې د ژغورنې په عملیاتو کې مرسته وکړي.
