د پاکستان د دفاع وزارت خواجه محمداصف ویلي چې له اسلامي امارت سره د شوې هوکړې خلاف د افغانستان خاوره د پاکستان پر ضد کارول کېږي.
د پاکستان د دفاع وزیر له جیونیوز سره په خبرو کې ویلي چې د اسلامي امارت حکومت پاکستان سره ژمنه کړې چې خاوره به یې د دغه هېواد پر وړاندې نه کارول کېږي.
په همدې حال کې پاکستاني چارواکو اسلامي امارت تورن کړی چې د پاکستان تحریک طالبانو غړیو ته یې پناه ورکړې او دوی هم د افغانستان له خاورې پاکستان کې بریدونه کوي.
بلخوا د پاکستان د ملي امنیت شورا هم په یوې ناسته کې ټينګار کړی چې هېڅ هېواد اجازه نه لري، څو ترهګرو ته پټنځایونه جوړ او اسانتیاوې ورته برابرې کړي.
د پاکستان د لومړي وزیر شهباز شریف په مشري د دغه هېواد د ملي امنیت شورا د ناستې په اړه په یوې خبرپاڼه کې ویل شوي چې پاکستان به د خپلو وګړو د امنیت خوندیتوب لپاره له خپلو حقوقو استفاده وکړي.
د یادونې وړ ده چې له دې وړاندې د پاکستان د کورنیو چارو وزیر راناثنالله هم ادعا کړې وه چې د پاکستان تحریک طالبان غړي په افغانستان کې حضور لري او د اړتیا پر مهال به د دوی د ځپلو لپاره عملیات وکړي.
د اسلامي امارت حکومت تراوسه د پاکستان د دفاع وزارت دغو څرګندونو ته غبرګون نه دی ښودلی ، خو د دفاع وزارت بیا د پاکستان د کورنیو چارو وزیر څرګندونو ته په غبرګون کې هغه پاروونکې او بېبنسټه بللي او ویلي یې دي چې پاکستاني طا لبان افغان خاوره کې شتون نهلري.
دغه وزارت د روانې اوونۍ د مرغومې په یوولسمه په یوې خبرپاڼه کې له پاکستان غوښتنه کړې چې هر ډول اندېښنې دې د خبرو له لارې هوارې کړي. دفاع وزارت ټينګار کړی چې افغانستان بېڅښتنه نه دی.
سلاموطندار پر ټویټر هم وڅارئ
دغه وزارت لیکلي: «غوښتنه مو دا ده چې هر ډول اندېښنې او ستونزې د خبرو له لارې حل شي. افغانستان بېڅښتنه نه دی، موږ د تل په څېر د خپل هېواد د ځمکنۍ بشپړتیا او خپواکۍ څخه د دفاع لپاره اماده یوو او د هېواد دفاع کې له هر چا ښه تجربه لرو.»
