په دې پاڼۍ کې د انګلستان لپاره هري برووک ۱۸۶ او جوو روټ ناسوځېدلې ۱۵۳ منډې جوړې کړې. کوربه نیوزیلنډ لوبډلې په خپله لومړنۍ توپوهنه کې د انګلستان د توپاچوونکو پر وړاندې پاتې راغله او ټوله لوبډله په ۲۰۹ منډو وسوځېده.
د انګلستان لوبډلې د ټسټ لوبو د اصولو له مخې، نیوزیلنډ ته د دویمې توپوهنې بلنه هم ورکړه او دا ځل یادې لوبډلې د کېن ویلیامسون د ۱۳۲ منډو پر مټ یې د ټولو لوبغاړو په سوځېدو ۴۸۳ منډې جوړې کړې او انګلستان ته یې د ۲۵۸ منډو هدف وټاکه.
د انګلستان د کرېکټ ملي لوبډلې د ۲۵۸ منډو ورکړل شوي هدف ترلاسه کولو په موخه لوبه پیل کړه چې ټوله لوبډله یې په ۲۵۶ منډو وسوځېده او د یوې منډې په توپیر یې ماته ومنله.
د نیوزیلنډ لپاره په توپاچوونه کې نېل واګنر ښکلې لوبه وکړه او د انګلستان څلور لوبغاړي یې وسوځول. د لوبې غوره لوبغاړی کېن ویلیامسون او د لوبلړۍ غوره لوبغاړی هري برووک ونومول شو.
سلاموطندار پر ټوېټرپاڼه هم وڅارئ
د دواړو لوبډلو ترمنځ د دوو ټسټ سیالیو لوبلړۍ یو یو مساوي پای ته ورسېده.
