د کورنیو چارو وزارت وایي، د وسلهوالو طالبانو بريدونو کې په تېرو ۳ میاشتو کې ۴۸۷ ملکي وګړي وژل شوي او ۱۰۴۹ نور ټپیان شوي دي. دغه شمېرې د ياد وزارت وياند طارق ارين پر خپله ټوېټرپاڼه ليکلي.
نوموړي ليکلي، طالبانو په دومره موده کې ۳۵ ځانمرګي بریدونه او ۵۰۷ چاودنې کړې دي.
ارين ویلي، طالبانو د ټولو انساني او اسلامي ارزښتونو خلاف ملکي وګړيو او عامه تاسیساتو ته زیان رسولی دی.
د نوموړي په وینا، د خلکو وژل جنګي جنایت دی او هېڅ ډول توجیه نه لري.
دا په داسې حال کې ده چې له تېرو ۳ مياشتو راهيسې د قطر په دوحه کې د افغان دولت او طالبانو ترمنځ د سولې خبرې روانې دي.
له دې خبرو سره سره هېواد کې تاوتريخوالی ډېر شوی دی چې افغان دولت، امريکا، ناټو او يو شمېر نورو ويلي چې افغانستان کې د تاوتريخوالي ډېرېدل هېڅ د منلو نه دی.
وسلهوالو طالبانو تراوسه پورې د حکومت د دې ادعا په اړه رسنیو ته څه نه دي ویلي.
