د اسراییل پوځ یو سرتېری تېره شپه د لبنان سویل کې د حزبالله برید کې وژل شوی.
د اسراییل پوځ نن جمعه د ثور ۲۵ / مې ۱۵ ویلي، تر اوربند وروسته د لبنان په سویل کې د وژل شویو سرتېرو شمېر یې ۶ ته لوړ شوی.
د راپورونو پر اساس، د ایران د جګړې له پیل راهیسې له حزبالله سره نښتو کې ټولټال ۱۹ اسراییلي سرتېري او یو ملکي قراردادي وژل شوی.
د اسراییل پوځ زیاته کړې چې تازه څو بېپیلوټه الوتکې چې د حزبالله له لوري توغول شوې وې، د لبنان پولې ته نږدې د اسراییل خاورې کې لګېدلي دي.
د دغو بېپیلوټه الوتکو د بریدونو له امله د اسراییل په څو سیمو کې د خطر زنګونه هم فعاله شوي، خو د پوځ په وینا یې چې چا ته په کې زیان نه دی اوښتی.
ورته مهال د لبنان روغتیا وزارت ویلي چې د حوت په ۱۲مه د جګړې د نوې څپې له پیل راهیسې دغه هېواد کې د وژل شویو کسانو ټول شمېر له ۲۸۰۰ اوښتی دی.
په همدې حال کې د اسراییل پوځ یوه خبرپاڼه کې د لبنان سویل کې د پنځو کلیو اوسېدونکو ته خبرداری ورکړی چې سیمه تخلیه کړي.
خبرپاڼه کې ویل شوي چې د شبریحا، حمادیه (صور)، زقوق المفدي، معشوق او الحوش سیمو اوسېدونکو دې د خپل امنیت د خوندي کولو لپاره ژر تر ژره خپل کورونه پرېږدي.
د اسراییل پوځ ویلي چې دغه خبرداری د حزبالله له لوري د اوربند د هوکړې د نقض په تعقیب خپور شوی دی.