یوشمېر هندي او نړیوالو رسنیو راپور ورکړی چې د هند په بېحار ایالت کې د زهرجنو شرابو د څښلو له امله لږ تر لږه ۳۱ کسان مړه شوي او یوشمېر نور یې روغتون کې بستر شوې دي.
دغو کسانو د بېحار ایالت له مرکز پټنا څخه ۶۰کیلو مټره لرې په سارن نومې ولسوالي کې د شرابو له څښلو وروسته خوا وګرځوله چې ځینو یې روغتون کې ساه ورکړه او نور یې بیا روغتون ته پر لاړه مړه شول.
محلي رسنۍ او چارواکو تراوسه د ۳۱ کسانو مړینه تایید کړې، خو زیاتوي چې ښايي د مړینې شمېرې لوړې شي.
بلخوا د یاد ایالت یوه پولیس چارواکي رسنیو ته ویلي چې تراوسه یې د پېښې په تړاو ۱۲۶ تورن کسان نیولي او د پېښې په اړه پلټنې روانې دي.
مړینه د ختیځ بېحار ایالت په دوو کلیو کې رامنځته شوې، چېرته چې یاده سیمه کې په ۲۰۱۶ کال کې د شرابو پلور او څښاک بند شوی و.
سلاموطندار پر ټویټر هم وڅارئ
د هند په نورو ایالتونو کې هم د شرابو پر پلور او څښاک بندیزونه لګېدلي، خو په یوشمېر ایالتونو کې په ناقانونه توګه شراب تولید او پلور کېږي چې هر کال د سلګونه کسانو ژوند اخلي.
