د احصايې او معلوماتو ملي اداره وایي چې په تېرو ۵ میاشتو کې د هېواد په ۲۰ ولایتونو کې شاوخوا ۷۵۹زره برښنایي تذکرې وېشل شوي چې له دې ډلې هره ورځ ۱۷ زره پېژندپاڼې وېشل کېږي.
د احصایې او معلوماتو ملي ادارې سرپرست فقیر محمد زیار نن په یوه خبري غونډه کې وویل، که څه هم یاده اداره د امکاناتو او بودجې له ستونزو سره مخ ده خو هڅه يې کړې چې په کابل او ولایتونو کې د یادې ادارې څانګې فعاله وساتي.
د سلاموطندار پښتو فېسبوکپاڼه وڅارئ
زیار زیاته کړې چې د احصایې او معلوماتو ادارې اړوند تخنیکي توکې د ورستیو سیاسي بدلونونو پرمهال ورک شوي چې له امله یې په ۱۴ ولایتونو کې د برېښناي پېژندپاڼو مرکزونه تړلې پاته دي.
دغه راز، د احصايي او معلوماتو ملي ادارې مرستیال حسیبالله موحد وايي د مالي امکاناتو نشتون او ټرانسپورټې ستونزو سره سره هم هڅه کوي چې د ګرځنده ټیمونو په جوړولو سره په دغو ولایتونو کې د برېښنايي پېژند پاڼو وېش بهیر په عادي ډول پیل کړي.
د احصايي او معلوماتو ملي ادارې مسوولان وايي چې ۸ میلیونه برېښنايي تذکرې د وېشلو لپاره چمتو دي. دوی زیاتوي چې د برېښنايي پېژند پاڼې د شکل او محتوا پر بدلون هم کار روان دی او ښایي چې د تذکرو جوړښت او محتوا بدلون وکړي.
