د جوزجان محلي مسوولان وايي چې په دغه ولایت کې د یوه «کوماز» موټر د چپه کېدو له امله پنځه کسان مړه شوي او ۲۸ نور ټپیان دي.
دغه پېښه پرون بېګاه شاوخوا ۱۱ بجې د دغه ولایت د قوشتپې ولسوالي په «ترکمنقدوق» سیمه کې رامنځته شوې ده.
د سلاموطندار پښتو فېسبوکپاڼه وڅارئ
په ورته مهال په قوشتپې ولسوالي کې محلي سرچینې سلاموطندار ته بیا وايي چې په دغه پېښه کې ۸ کسان مړه شوي او ۲۸ نور ټپیان شوي دي.
د جوزجان د عامې روغتیا ریاست سرپرست عبدالغني صمیم وايي، پېښه هغه مهال رامنځته شوې چې یاد کسان له قوشتپې ولسوالي څخه د شبرغان ښار پر لوري روان وو.
د عامې روغتیا ریاست سرپرست زیاتوي چې د پېښې ټپیان او مړي یې ولایتي روغتون ته لږېدولي دي. د هغه په وینا، د یوشمېر ټپیانو روغتیايي وضعیت د اندېښنې وړ دی.
د وروستیو میاشتو پرمهال د هېواد په بېلابېلو ولایتونو کې ټرافیکي پېښې زیاتې شوي چې له امله یې یوشمېر کسانو ته مرګژوبله هم اوښتې ده.
