د بهرنیو چارو وزارت وايي، محمد حنيف اتمر نن د افغان سولې لپاره د سیمهییزې او نړیوالې اجماع پياوړي کولو په موخه هند ته لاړ.
له ياد وزارته په خپره شوې خبرپاڼه کې راغلي، دغه سفر کې به د افغان سولې په اړه او همداراز د دوه اړخیزو اړیکو او له ترهګرۍ سره د ګډې مبارزې د همکاریو د پراختیا په موخه هم خبرې وشي.
محمد حنیف اتمر به د هند د بهرنیو چارو له وزیر اسجي شنکر، د ملي امنيت سلاکار اجيت دوال او یو شمېر نورو هندي لوړپوړيو چارواکيو سره هم ليده کاته وکړي.
د بهرنيو چارو خبرپاڼه زياتوي، د ياد وزارت وزير به همداراز په هند کې د افغانستان سفارت له ډيپلوماټانو، محصلانو، سوداګرو، د اهل هنودو له استازيو او افغان کډوالو سره هم وګوري.
محمد حنيف اتمر په داسې حال کې هند تللی چې ټاکل شوې د روانې ميلادي مياشتې پای کې د افغانستان د سولې لپاره د ملګرو ملتونو د عمومي منشي په کوربهتوب د اغېزمنو هېوادونو د وزیرانو غونډه جوړه شي. همداراز ټاکل شوې بله غونډه د ترکيې په کوربهتوب اپرېل میاشت کې جوړه شي.
