د فراه امنیه قومانداني په دغه ولایت کې د هاوان یوې ناچاودې مرمۍ د چاودنې له کبله د درې ماشومانو د وژل کېدو خبر ورکوي.
د فراه د امنیې قومانداني د رسنیو دفتر په یوه خبرپاڼه کې لیکلي، یاد ماشومان نن د دغه ولایت د مرکز اړوند په عسکراباد سیمه کې له جګړې د پاتې ناچاودې هاوان مرمۍ د چاودنې له کبله وژل شوي دي.
د خبرپاڼې له مخې، یاده مرمۍ هغه مهال چاودلې چې ماشومانو پرې لوبې کولې.
دا داسې مهال ده چې تر دې وړاندې هم وختناوخت د هېواد په یوشمېر ولایتونو کې د ناچاودو مرمیو د چاودنو له کبله ګڼشمېر کسانو، په تېره ماشومانو ته مرګژوبله اوښتې ده.
