د غزني امنیتي مسوولان تاییدوي چې دغه ولایت کې یوه کس په خپل موټر کې ځان ته اور اچولی او وژلی دی.
د غزني د امنیې قومانداني ویاند خالد سرحدي سلاموطندار ته ویلي چې یاد کس عبدالبشیر نومېده او پرون مازدیګر یې د دغه ولایت په «ګذرګاه سخي» کې هغه مهال ځان ته اور اچولی چې یوه اووهلس کلنه نجلۍ هم ورسره ده.
د نوموړي په وینا، دې پېښه کې عبدالبشیر وژل شوی او نجلۍ هم ۸۰ سلنه سوځېدلې چې اوس په کُما کې ده.
سره له دې چې دا پېښه پېچلې برېښي، خو د غزني د امنیې قومانداني د ویاند په خبره، د دوی د لومړنیو څېړنو پر بنسټ، یاد کس خپله ځان ته اور اچولی او موټر یې هم په بشپړ ډول سوځېدلی دی.
د سلاموطندار پښتو فېسبوکپاڼه وڅارئ
تر اوسه روښانه نهده چې عبدالبشیر له یادې سوځېدلې نجلۍ سره څه تړاو لري او ولې یې ځان او هم دا نجلۍ سوځولې ده.
