کندوز ښار کې ولسي سرچینې وايي چې د ښار اړوند د خاناباد بندر سیمه کې یوه هلک لومړی یوه نجلۍ او وروسته یې ځان وژل دی.
سرچینې سلاموطندار ته ویلي چې پېښه دوه ورځې وړاندې د لړم پر څلورمه نېټه د کندوز ښار اړوند خاناباد بندر سیمه کې رامنځته شوې ده.
په ورته مهال سرچینې زیاتوي پېښه هغه مهال رامنځته شوې چې جهش نومي هلک له یادې نجلۍ سره مینه درلوده، خو کورنۍ یې هغه یوه بل هلک ته په نوم کړې وه او له همدې امله دغه هلک لومړی نجلۍ او وروسته یې ځان وژلی دی.
بلخوا د کندوز د امنیې قومنداني ویاند عبیدالله عابدي وايي چې د کورنیو ستونزو له امله جهش نومي کس د «فریدې» په نوم یوه نجلۍ په توپانچه وېشتلې او وروسته خپل ځان هم ویشتلی چې دواړه وژل شوي دي.
سلاموطندار پر ټویټر هم وڅارئ
نوموړی زیاتوي چې یاده نجلۍ دوه میاشتې وړاندې یوه بل هلک ته کوژدن شوې وه او په وینا یې، امنیتي ځواکونو د یادې پېښې د انګېزې معلومولو لپاره خپلې هڅې پیل کړي دي.