د پاکستان ډان ورځپاڼې راپور ورکړی چې د دغه هېواد یو پلاوی د اسلامي امارت له چارواکو سره د سوداګرۍ، ټرانزیټ، لېږد رالېږد او د ډبرو سکرو د لېږد په تړاو د خبرو لپاره نن کابل ته راځي.
ډان ورځپاڼې لیکلي چې د یاد پلاوي مشري د پاکستان د سوداګرۍ وزیر سوالهاحمد فاروقي پر غاړه لري او ورسره د یاد هېواد د انرژۍ، کورنیو چارو، سوداګرۍ او لېږد رالېږد وزارتونو چارواکو هم مل دي.
د سلاموطندار پښتو فېسبوکپاڼه وڅارئ
د پاکستان د سوداګرۍ وزارت ویلي چې دغه پلاوی به کابل کې د اسلامي امارت له چارواکو سره د دواړو هېوادونو ترمنځ د سوداګرۍ او ټرانزیټ په تړاو خبرې وکړي.
په ورته مهال ډان ورځپاڼې لیکلي چې پاکستان هوډ لري، څو له افغانستان سره د سوداګرۍ شرایط جنس په جنس او راکړه ورکړه په پاکستانۍ کلدارې کړي.
د یادې ورځپاڼې د راپور له مخې، پاکستان همداراز هوډ لري چې له افغانستان څخه د ډبرو سکرو د لېږد بهیر شپه او ورځ شي.
پاکستان په داسې حال کې له افغانستان څخه د ډبرو سکرو د لېږد برخه کې د اسانتیاوې د رامنځته کولو خبره کوي چې په دې وروستیو کې نړیوالو بازارونو کې د ډبرو سکرو بیې لوړې شوې دي.
