پاکستاني رسنیو خبر ورکړی چې د دغه هېواد محکمې د پاکستان د مخکیني لومړي وزیر عمرانخان د نیولو امر کړی دی.
د راپورونو پر بنسټ، د پاکستان یوه لوړپوړي قاضي پرون د عمرانخان د نیولو حکم لاسلیک کړی او نن شنبه دغه حکم رسنیز شو.
د راپورونو له مخې، د پاکستان یوې محکمې د پولیسو یوه افسر او یوې ښځینه قاضي ته د سپکاوي په تور د هغه د نیولو حکم کړی دی.
عمرانخان د تېرې زمري میاشتې په ۲۹مه خپلو پلویانو ته د وینا پر مهال ویلي و چې د اسلاماباد د پولیسو رییس او یوې ښځینه قاضي زېبا چودري پر وړاندې به قانوني اقدام وکړي.
زېبا چودري د دوو ورځو لپاره د عمرانخان د دفتر رییس شهبازګل د نیولو امر کړی و.
د پاکستان حکومت او عمرانخان تراوسه په رسمي ډول په دې اړه څه نهدي ویلي.