نن په کابل کې د ریاستالوزرا د لومړي مرستیال ملا عبدالغني برادر په ګډون د یوشمېر حکومتي چارواکو له لوري د ۲۵۰ میلیونه ډالرو په ارزښت د افغان انوېسټ «افغان پانګونې» په نوم د یوه ستر شرکت د جوړېدو پرانسته وشوه.
د یاد شرکت رییس شېرباز کمینزاده په دغه پرانستغونډه کې وویل چې افغان انوېسټ شرکت د ۱۳ کسانو له لورې جوړ شوی او په وینا یې، هڅه به وکړي چې د سهم لرونکو شمېر یې له ۴۰ تر ۵۰ کسانو ورسوي.
د سلاموطندار پښتو فېسبوکپاڼه وڅارئ
په ورته مهال کمینزاده زیاته کړه، هېواد کې د پانګونې زمینه برابره شوې او امنیت هم تر پخوا ټينګ شوی دی چې په بېلابېلو برخو کې د پانګونې سره به ځوانانو ته د کار زمینه برابره شي.
نوموړي وویل: «مونږ ټول سره راټول شوي یو او دې ته مو ملا وتړله چې په لومړي ګام کې به له ۲۵۰ نه تر۳۰۰ میلیونه ډالر ابتدایي پانګونه کوو، په ۴سکټورونو کې اول د انرژۍ سکټور بیا کانونه، زېربنا او د کرنې برخه کې پانګونه کوو.»
د یاد شرکت په پرانیستغونډه کې د سوداګرۍ وزیر نورالدین عزیزی وویل چې حکومت په هره برخه کې د پانګوالو ملاتړ ته دوام ورکوي او په وینا یې، اوس ګڼشمېر پانګوال دې شرکت سره یوځای شوي چې په ګډه ځینې پروژې پیل او په بېلابېلو سکټورونو کې به پانګونې وکړي.
په همدې حال کې عزیزي وویل چې له هېواده بهر له ځینو افغان پانګوالو سره خبرې کړي او هېواد ته يې د بېرته راتلو بلنه ورکړې چې په کور دننه پانګونه وکړي.
د سوداګرۍ وزیر همداراز وویل چې روان کال به د صادراتو کچه هم تر دوه میلیارده ډالرو ورسېږي، خو په وینا یې چې اوس هم ځینو پانګوالو وسره ستونزې شریکې کړي چې پر حل کېدو به يې له نړیوال بانک او ملګرو ملتونو سره خبرې وکړي.
دغهراز د ریاستالوزرا لومړي مرستیال او د اقتصادی کمېسیون رییس ملاعبدالغنی برادر په دې غونډه کې وویل، په هغه هېواد کې چې سوداګري او راکړه ورکړه نه وي، هغه هېواد پرمختګ نشی کولای.
د نوموړي په خبره، افغانستان د طبیعي سرچینو له اړخه شتمن هېواد دی، که ګټه ترې واخیستل شي، افغانان به له بېوزلۍ خلاص او هېوادونو ته به د مرستې لاس نه ورغځوي. ملا برادر پر پانګوالو غږ وکړ چې هېواد ته راستانه شي.
باید وویل شي چې افغانستان کې اوس هم په کم شمېر د اړتیا وړ توکې تولیدېږي او د اړتیا وړ ډېری توکي له نورو هېوادونو افغانستان ته راوړل کېږي.
ډېری پانګوال په هېواد کې د امنیت د نهشتون ترڅنګ، د برښنا کمښت او نورو لاملونه د خپلې پانګونې پروړاندې ستر خنډ بولي، خو حکومتي چارواکو تل په دې برخه کې د ستونزو د هواري ډاډ ورکړی دی.
