په کابل کې د جاپان سفارت نن (د لیندۍ دیارلسمه، د دوشنبې ورځ) پر خپلې اېکسپاڼې لیکلي چې هېواد یې له افغانستان سره ۵۸،۴ میلیونه ډالره مرسته کوي. د جاپان سفارت هیلهمندي ښودلې چې دا پیسې به د افغانانو د باعزته ژوند او پر ځان بسیاینې لپاره مرسته وکړي.
یاد سفارت زیاته کړې: «په خوښۍ اعلان کوو چې د جاپان دولت پرېکړه کړې چې له افغانستان سره د بشری مرستو او بنسټیزو اړتیاوو پوره کېدو په موخه ۵۸،۴ میلیونه ډالره اضافي مرسته وکړي.»
په کابل کې د جاپان سفارت په وینا، دا مرستې به د ملګرو ملتونو اړوندو ادارو، نړیوالو سازمانونو او د جاپان نادولتي موسسو له لارې افغانانو ته ورسېږي.
دغه سفارت لیکلي: «په دغو ۵۸،۴ میلیونه ډالرو سره به د ۲۰۲۱ کال له اګېسټ میاشتې راهیسې له افغانستان سره د جاپان د مرستو کچه ۴۴۷ میلیونه ډالرو ته ورسېږي.»
د یادونې ده چې د افغانستان لپاره د المان سفارت هم څو ورځې مخکې اعلان وکړ چې هېواد یې په افغانستان او ګاونډیو هېوادونو کې خلکو ته د مرستو رسولو په موخه ۶۰ میلیونه یورو د ملګرو ملتونو د خوړو پروګرام په واک کې ورکړې دي.
سلاموطندار پر ټویټر هم وڅارئ
دغه سفارت د لیندۍ په نهمه، د پنجشنبې ورځ پر خپلې اېکسپاڼې لیکلي و چې یاده بودیجه به د بشردوستانو مرستو، د هرات زلزلهځپلیو او له پاکستانه اېستل کېدونکو افغان کډوالو سره د مرستو لړۍ پیاوړې کړي.
