د ازموینو ملي اداره نن شنبه د لړم ۱۴مه د یو لړ مراسمو په لړ کې د ۱۴۰۱ کال د کانکور د ازموینې پایلې اعلان کړې.
د یادې ادارې د اعلان مخې، سږ کال له هرات ولایت څخه د سلیمان ولد غلام جیلاني په نوم یو زدهکوونکی په ۳۵۵.۴۲۰۴ نمرو د سږني کانکور عمومي اول نمره اعلان شوی دی.
همداراز د اعلان شویو پایلو پر بنسټ له کابل څخه د محمدشبیر ولد ناظرحسین په نوم یوه زدهکوونکي بیا د ۳۵۵٫۳۲۸ نمرو په ترلاس کولو سره د ۱۴۰۱ کال د کانکور ازموینې دویم نمره اعلان شوی.
همداراز له هرات څخه د هدایتالله په نوم یوه بل زدهکوونکي هم په ۳۵۴ نمرو درېم ځای خپل کړی دی.
د ازموینو ملي ادارې سرپرست عبدالقدیر خموش د سږني کال د کانکور ازموینې د پایلو د اعلان په اړه جوړې شوې غونډې ته وویل، هغو کسانو چې د کانکور په ازموینه کې د خپلې خوښې پوهنځي ته لار نه ده پیدا کړې، کولای شي هغو پوهنځیو کې نوملیکنه وکړي چې شمېر«پذیرش» یې نه وي پوره شوی.
د نوموړي په وینا، د دغه بهیر تګلاره به وروسته په ډاګه شي.
بلخوا د ازموینو ملي ادارې سرپرست زیاته کړه، هغه کسان چې د کانکور ازموینې له پایلې شکایت لري، کولای شي د یوه فورم له لارې خپل شکایت تر یادې ادارې ورسوي او دوی به یې په اړه پلټنه وکړي.
سلاموطندار پر ټویټر هم وڅارئ
د ازموینې ملي ادارې د معلوماتو پر بنسټ، د روان کال د کانکور ازموینې کې ۱۶۰زره او درې کسانو ګډون کړی وو. د یادې ادارې په وینا، د کانکور ازموینې ګډونوال کولای شي چې د نن ورځې له ۱۲ بجو وروسته خپلې پایلې په انلاین بڼه چک کړي.
