په افغانستان کې د امریکا پخواني سفیر راین کراکر په خپل تازه مرکه کې ویلي د افغانستان ځينې ګاونډي او د سیمې ځينې هېوادونه دې ته لېواله دي چې د افغانستان نوی حکومت په رسمیت وپېژني، خو دغه هېوادونه د امریکا له وېرې دا کار نه شي کولی.
د سلاموطندار پښتو فېسبوکپاڼه وڅارئ
کراکر زیاته کړې، د افغانستان نوی حکومت د رسمیت پېژندلو لپاره لا ډېرو هڅو او اقداماتو ته اړتیا لري او تر هغه یې چې امریکا د اسلامي امارت حکومت په رسمیت و نه پېژني د سیمې یو هېواد به هم دغه ډول اقدام ترسره نه کړي.
هغه د یوې پوښتنې په ځواب کې ویلي، که د سیمې هېوادونه د امریکا له خوښې پرته د افغانستان نوی حکومت په رسمیت پېژني، نو ښایي له بندیزونو سره مخ شي.
دغه پخوانی امریکايي ديپلوماټ داسې مهال دغه څرګندونې کوي چې افغان حکومت د رسمیت پېژندل کېدو په لټه کې دی. خو شاوخوا ۷ میاشتې وشوې چې اسلامي امارت واک ته رسېدلی خو یو هېواد هم تراوسه د دوی حکومت په رسمیت نه دی پیژندلی.
