د ولسمشر دویم مرستیال سرور دانش په کابل کې د خبرو پرمهال وویل، په بینالافغاني خبرو کې د طالبانو بې ځایه ضد دغه خبرې له بن بست سره مخ کړې دي.
دانش د سولې خبرو کې له منځته راغلي وضعیته نیوکه وکړه او ويې ویل، افغان دولت د سولې په خبرو کې د پرمختګ لپاره د قران او سنت وړاندیز وکړ؛ خو طالبانو د قدرت ترلاسه کولو لپاره قران او سنت ته هم شا کړه او د سولې خبرو د بنسټ په توګه یې شریعت هم ونه مانه.
نوموړي ټینګار وکړ چې د طالبانو د جهاد منطق اوس پای ته رسېدلی او په تېره کې هم دغه ادعا د تاوتریخوالي توجیه کولو لپاره یوه غیر واقعي ادعا وه.
له دې يوه ورځ وړاندې د سولې خبرو لپاره د افغان مرکچي پلاوي مشر معصوم ستانکزي په یوه ټوېټري پیغام کې ویلي و چې هيله لري د سولې خبرې د قران او سنت په رڼا کې د خلکو له غوښتنې سره سم غوښتل شوې پایله ولري.
د ستانکزي په ټوېټ کې راغلي چې هېڅوک نهشي کولای د سولې لپاره د خلکو غوښتنه رد کړي.
اوس پوښتنه دا ده چې ایا د قران او سنت په رڼا کې د سولې خبرو اترو پرمخ وړل به د طالبانو له خوا ومنل شي که نه؟ د طالبانو یو پخوانی چارواکی سید اکبر اغا وايي، طالبان د قران او سنت له مخې د خبرو اترو مخکې وړل نه مني او له امریکا سره د دې ډلې پر کړي هوکړه لیک ټینګار کوي.
د سیاسي چارو کارپوه جعفر مهدوي وايي، که څه هم قران او سنت دوه معتبرې اسلامي سرچینې دي؛ خو د سولې په خبرو کې د اختلافونو هوارولو لپاره د دغو ارزښتونو وړاندیز د امتیاز اخستنې اړخ لري.
له دې ټولو سره، قطر کې د افغان پلاوي او طالبانو د استازيو ترمنځ د خبرو له پيل یوه میاشت اوړي، خو لاهم د دغو خبرو اترو د کړنلارې په اړه اختلافونه دوام لري.