د پکتیا محلي مسوولان وايي چې د دغه ولایت په مرکز او یوشمېر ولسوالیو کې سلګونه نجونو او هلکانو ته د لومړنیو زدهکړو ۱۵۰ محلي ټولګي جوړ شوي دي.
دغه محلي ټولګي د یونېسف په مالي لګښت او د افغان پرمختیایي موسسې لهخوا جوړ شوي دي.
د سلاموطندار پښتو فېسبوکپاڼه وڅارئ
د پکتیا پوهنې رییس عبدالوکیل خالد سلاموطندار ته ویلي چې یاد ټولګي د مرکز ګردېز ښار په ګډون په زرمت، روحاني بابا ، احمدابا او سیدکرم ولسوالیو کې فعال شوي او په عملي توګه پهکې زدهکړې روانې دي.
د هغه په وینا، دا لومړی ځل دی چې دغه ډول ټولګي د پوهنې ریاست تر څار لاندې جوړېږي چې په سلګونه نجونې او هلکان پهکې لومړنۍ زدهکړې ترلاسه کوي.
د پکتیا پوهنې رییس عبدالوکیل خالد زیاته کړه چې دغو ټولګیو کې هغو ماشومانو ته د زدهکړو زمینه برابره شوې چې له ښوونځي پاتي وو.
هغه له نورو موسسو هم غوښتنه وکړه چې د دغه ولا یت په لرېپرتو او کلیوالي سیمو کې دا ډول محلي ټولګي فعال کړي چې په وینا یې، پاتې ماشومانو ته هم د زدهکړو زمینه برابره شي.
یونېسف له دې وړاندې هم پکتیا کې او د هېواد په ګڼشمېر ولایتونو کې له ښوونځیو پاتې نجونو او هلکانو ته د محلي ټولګیو له لارې د زدهکړو زمینه برابره کړې ده.
په تازهګۍ سره یادې ادارې په یوې خبرپاڼه کې ویلي چې د روان میلادي کال تر پایه به افغانستان کې د محلي ټولګیو شمېر ۲۱۰۰۰ ته لوړ کړي.
