عراق کې چارواکي وايي چې د دغه هېواد په شمال کې د یوه واده مراسمو پر مهال د اورلګېدنې له امله ۱۱۳ کسان مړه شوي او څه باندې ۱۵۰ کسان ټپیان دي.
د نینوی ښار مرستیال والي حسن العلق رویټرز خبري اژانس ته ویلي، تراوسه د ۱۱۳ کسانو مړینه تایید شوې او په وینا یې، اور بېګاه شپه ۱۰:۴۵ بجې لګېدلی و.
سیمهییزو رسنیو راپور ورکړی چې ناوې او زوم هم په قربانیانو کې شامل دي. چارواکو همداراز خبرداری ورکړی چې ښايي د مړینې شمېرې له دې هم لوړې شي.
پېښه د نینوی ښار حمدانیه سیمه کې شوې چې د شمالي ښار موصل څخه بهر پروت دی او له پلازمینې بغداد څخه ۴۰۰ کیلومټره لرې دی.
تراوسه په یادو مراسمو کې د اورلګېدنې اصلي لامل نهدی روښانه شوی، خو لومړني راپورونه ښيي چې اورلګېدنه د اورلوبو وسایلو له کبله رامنځته شوې ده.
عراق کې د ودونو پر مهال اورلوبه عادي خبره او ویل کېږي چې دې مراسمو کې شاوخوا ۱۰۰۰ کسانو ګډون کړی وو.
سلاموطندار پر ټویټر هم وڅارئ
د عراق لومړي وزیر محمدشیعه السوداني د یادې پېښې د پلټنې امر کړی او د دغه هېواد کورنیو او روغتیا وزارتونو ته یې لارښوونه کړې چې د پېښې ځای ته بېړنۍ مرستې ورسوي.