خوست کې د یوه خصوصي شرکت لهخوا د ۱۰۵ میلیون افغانیو په لګښت د يو عصري تفریحي کمپلکس جوړولو چارې پیل شوې.
د خوست د والي مرستیال مولوي محبوب شاه قانت د ياد کمپلکس د چارو پيل مراسمو کې ویلي، د خوست ښار د خپلواکۍ منار ترڅنګ، د دغه تفريحي کمپلکس د جوړېدو قرارداد د شلو کلونو لپاره له «هارون رشید صدیقي» خصوصي شرکت سره لاسلیک شوی.
هغه وویل، دغه کمپلکس چې لوی هوټل، مېلمستون او عصري سونا به ولري، په ۳ جريبه ځمکه کې د سیاحت، تفریح او خدماتي سکټور پیاوړتیا او خلکو ته د کاري فرصتونو برابرولو په موخه جوړيږي.
هغه له نورو سوداګرو او پانګهوالو هم وغوښتل چې خوست کې پانګونه وکړي او د هېواد د اقتصادي ودې او آبادۍ برخه شي.
د خوست د کرنې، اوبو لګولو او مالدارۍ رییس مولوي شیرمحمد ذبیح هم له سوداګرو وغوښتل چې د هېواد په بیارغونه کې فعاله ونډه واخلي او د اجارې له لارې خپلې پانګونې پراخې کړي.