نن سهار د غزني ولایت د عامه ساتنې پر کنډک موټربم برید شوی دی.
د غزني د ولایتي شورا رییس نصیراحمد فقیري د دغه خبر د تایید ترڅنګ وايي، یاد برید نن سهار د غزني ښار په درېیمه امنیتي حوزه کې شوی دی. د نوموړي په وینا، له چاودنې څو دقیقې وروسته په سیمه کې د ډزو غږونه هم اورېدل شوي دي.
د غزني د ولایتي روغتون رییس بازمحمد همت وايي چې تر اوسه د پېښې له ځایه ۲۷ جسدونه او ۱۷ ټپیان دغه روغتون ته ور وړل شوي دي. د همت په وینا، ټول قربانیان نظامیان دي.
کورنیو چارو وزارت هم دغه برید تایید کړی او ویلي یې دي چې یوه «ځانمرګي» له چاودېدونکو توکو ډک موټر ته د غزني ولایت د «دهیک» ولسوالي پر لارې چاودنه ورکړې ده.
تراوسه د دغه برید په اړه نور جزیات نشته.
دغه راز، تراوسه کوم چا یا ډلې د دغه برید مسوولیت پر غاړه نه دی اخیستی.
