د کرېکټ شورا له لوري د نړیوالو شل اووره لوبو په تازه درجه بندۍ کې د هند د کرېکټ ملي لوبډلې توپوهونکی سوریا کومار یادوف د نړۍ د غوره توپوهونکي په توګه اعلان شوی دی.
سوریا کومار یادوف په روان کرېکټ شل اووره نړیوال جام او د وروستي یوه کال پر مهال د هند کرېکټ ملي لوبډلې لپاره ډېر ښې لوبې کړې دي.
نوموړی په ۸۶۳ امتیازونو سره د شل اووره نړیوالو سیالیو لومړی نمبر لوبغاړی اعلان شوی دی.
له نوموړي وروسته د پاکستان د کرېکټ لوبډلې لوبغاړی محمدرضوان دویم او د نیوزیلنډ د کرېکټ ملي لوبډلې لوبغاړي ډاوېډ کانوې درېیم ځای خپل کړی دی.
په نوې درجهبندۍ کې د پاکستان بل توپوهونکی بابر عظم د نړیوالو شل اووره لوبې د غوره توپوهونکو د درجهبندۍ په نوملړ کې څلورم ځای لري، خو هندی ویرات کوهلي بیا د دې جدول په لسم ځای کې دی.
سلاموطندار پر ټویټر هم وڅارئ
له دې وړاندې د کرېکټ شل اووره سیالیو د توپ اچوونکو په اعلان شوې تازه درجهبندۍ کې راشیدخان بیا د نړۍ د شل اووره لوبو د غوره توپاچوونکي په توګه معرفي شوی و.