د اوکراین ولسمشر ولودېمېر زېلېنسکي وايي چې شاوخوا شل هېوادونه له اوکراین سره د بېپیلوټه الوتکو (ډرونونو) د همکاریو تړونونو ته لېوالتیا لري او تراوسه څلور تړونونه هم لاسلیک شوي دي.
د «رویټرز» خبري اژانس د راپور له مخې، د جګړې له پیل راهیسې زېلېنسکي توانېدلی چې د اوکراین د ډرون جګړې تجربه د خپلو سفرونو او ډیپلوماتیکو اړیکو له لارې د منځني ختیځ او اروپا له ګڼو هېوادونو سره په همکاریو بدله کړي.
زېلېنسکي پر خپله اېکسپاڼه لیکلي: «اوس مهال شاوخوا شل هېوادونه د دې بهیر په بېلابېلو پړاوونو کې ګډون لري. تر دې دمه څلور هوکړهلیکونه لاسلیک شوي او د دغو تړونونو په چوکاټ کې لومړني قراردادونه د چمتوکېدو په حال کې دي.»
اوکراین د اپرېل په میاشت کې له جرمني، ناروې او هالنډ سره د دفاعي او ډرون همکاریو تړونونه لاسلیک کړل. تر دې مخکې د مارچ په وروستیو کې اوکراین له سعودي عربستان، قطر او متحده عربي اماراتو سره اوږدمهاله امنیتي مشارکتونه جوړ کړي وو.
اوکراین تېره میاشت د اذربایجان له ولسمشر الهام علياوف سره هم د دفاع او انرژۍ په برخو کې تړونونه لاسلیک کړل.
زېلېنسکي په خپل پیغام کې زیاته کړه چې اوکراین غواړي د ډرون تړونونو له لارې د نړۍ له یوې بلې سیمې سره هم امنیتي همکارۍ پیل کړي، خو دا یې روښانه نهکړه چې کومې سیمې ته اشاره کوي.