د ملګرو ملتونو د بشري حقونو عالي کمېشنر فولکر تورک د بشري حقونو نړیوالې ورځې له را رسېدو سره هممهاله د افغانستان په بېلابېلو ولایتونو کې د حد او قصاص جاري کولو پر وړاندې غبرګون ښودلی او له اسلامي امارت څخه یې غوښتي چې قصاص او د خلکو په دُرو وهلو سزاوې دې ودروي.
خو د اسلامي امارت د ویاند مرستیال بلال کریمي له سلاموطندار سره په مرکه کې ټینګار کړی چې د حد او قصاص جاري کول د الله حکم دی.
د سلاموطندار پښتو فېسبوکپاڼه وڅارئ
هغه له نړیوالې ټولنې څخه غوښتنه کوي چې د افغانستان په اړه مسوولانه خبرې وکړي او اسلامي ارزښتونو او د افغانانو فرهنګ ته دې هم سپکاوی نه کوي.
په همدې حال کې د اسلامي امارت له لوري د منحل شوي بشري حقونو کمېسیون رییسه شهرزاد اکبر په افغانستان کې د بشري حقونو وضعیت ترینګلی بولي. هغې ویلي، اسلامي امارت د ټولنې پر بنسټیزو ستونزو د تمرکز پر ځای، د بشري حقونو نقض ته دوام ورکوي.
بلهخوا د سیاسي چارو شنونکی طارق فرهادي وايي، که څه هم د بشري حقونو منشور له الهي ادیانو الهام اخیستی، خو په خبره یې، هغه سازمان چې دغه منشور پلی کوي، له هېوادونو سره دوهګونی چلن کوي.
هغه زیاتوي: «د بشري حقونو منشور چې له الهي ادیانو څخه یې الهام اخیستی، ۷۴ کاله وړاندې لیکل شوی. ستونزه دا ده، هغه سازمان چې دغه منشور پر هېوادونو پلی کوي، د ځینو هېوادونو په اړه چوپتیا غوره کوي.»
د یادونې ده چې په تېرو شلو ورځو کې د هېواد په یوشمېر ولایتونو کې پر بېلابېلو جرمونو محکوم شوي کسان په دُرو وهل شوي او په فراه ولایت کې بیا یو کس قصاص شوی هم دی.
د اسلامي امارت دغه کار د نړیوالې ټولنې، په تېره د بشري حقونو د اړوندو بنسټونو غبرګونونه را پارولي دي.
