د ملګروملتونو پراختیايي پروګرام افغانستان کې د بېوزلۍ پراخېدو په اړه اندېښنه ښودلې او ویلي یې دي چې د مالي تمویلوونکو د مرستو کمښت ترڅنګ دغه هېواد کې د خلکو ورځنی عاید هم کم شوی دی.
د ملګروملتونو پراختیايي پروګرام له لوري په خپره شوې خبرپاڼه کې راغلي چې افغانستان کې ۸۵سلنه خلک د ورځې له یوه ډالر کم عاید لري.
د سلاموطندار پښتو فېسبوکپاڼه وڅارئ
په خبرپاڼه کې ویل شوي چې د ملګروملتو د سرمنشي مرستيال او په اسيا پسفيک کي د دغه سازمان سيمهییزې استازې کاني ويګناراجا د ملګرو ملتو د المان له ټولنې سره په کتنه کې د بېوزلۍ له امله له سخت وضعیت سره د مخ ښځو په اړه خبرې کړې دي.
په خبرپاڼه کې ویل شوي: «موږ په مستقیم ډول د ښځو د سوداګرۍ، کار، بنسټیزو ټولنیزو خدماتو، د نوي کیدونکي انرژۍ ناورین پر مدیریت تمرکز کوو.»
د اقتصادي چارو یوشمېر کارپوهان هېواد کې د بېوزلۍ د پراخېدو لاملونه، د اقلیم بدلون، وچکالي او سخت سیلابونه بولي. د اقتصادي چارو کارپوه نصیراحمد رشتیا وايي: «د اقتصادي زیربناوو نشتون، د حکومت او غیردولتي بنسټونو له لوري د پانګهونې کمښت چې هېواد کې د فقر لوړېدو لامل شوی او همداراز هېواد کې د کاري زمینې د کمښت لامل هم شوی دی.»
د یادونې وړ ده چې تر دې مخکې د ملګروملتونو د بشري مرستو د همغږۍ دفتر (OCHA) هېواد کې د بېوزلۍ د پراخېدو په اړه اندېښنه ښودلې وه او ویلي وو، سږ کال به په افغانستان کې شاوخوا ۲۳ میلیونه وګړي بشري مرستو ته اړتیا ولري.
اوچا زیاتوي چې اوس د افغانستان نیمايي نفوس له بېوزلۍ سره لاس او ګرېوان دی چې له ډلې یې ډېرې یې ښځې دي.