د هرات محلي مسوولان وايي چې د دغه ولایت په «اسلامقلعه» بندر کې یې د ۱۶۰زره امریکايي ډالرو په لګښت د نريذرنځ یا «توبرکلوز» د تشخیص دوه ماشینونه فعال کړي دي.
د یاد ولایت د مسوولانو په وینا، د «اکسرې او پروتېبل» دغه دوه دستګاوې یې د هغو کډوالو د توبرکلوز ناروغي تشخیص لپاره فعالې کړي چې له ایران څخه بېرته افغانستان ته راستانه کېږي.
د سلاموطندار پښتو برخه دلته وڅارئ
دغه دستګاوې ایران سره پولې ته نږدې په صفري نقطه او د اسلامقلعه روغتیايي کلینیک کې نصب شوي دي.
د عامې روغتیا وزارت د توبرکلوز ملي پروګرام مسوول خانمحمد منګل ویلي چې دغه دستګاوې په دوو ثانیو کې پر توبرکلوز د اخته کسانو د تشخیص ظرفیت لري.
منګل زیاته کړه وروسته له هغې چې پر توبرکلوز د اخته کسانو ناروغي تشخصېږي، په خپلو اصلي سیمو کې یې درملنه کېږي. د توبرکلوز ملي پروګرام مسوول همداراز وویل چې تېر کال په ټول هېواد کې ۵۳زره کسان پر توبرکلوز اخته او درملنه یې شوې ده.
بلخوا هرات کې د توبرکلوز پروګرام مسوول عبدالرحمن احمدي وايي چې د یادو دستګاوو په فعالېدو سره به دغه ولایت کې پر توبرکلوز اخته ناروغانو د درملنې برخه کې د پام وړ اسانتیاوې رامنځته شي.
د نوموړي د معلوماتو له مخې، تېر کال دغه ولایت کې د توبرکلوز ۲۸۰۰ پېښې ثبت شوي چې د روغتیاپالانو له لوري یې درملنه هم شوې ده.
د هرات د روغتیايي مسوولانو په وینا، پر توبرکلوز د اخته ناروغانو تشخیص او درملنه وړیا ده چې له شپږو تر یوه کال پورې وخت ته اړتیا لري.