د بغلان د امنیې قومنداني ویاند او د رسنیو برخې مسوول شېراحمد برهاني سلاموطندار ته ویلي چې دغه ولایت کې سیند ته د یوه موټر د لوېدو له امله پنځه کسان مړه او یو بل کس ټپي شوی دی.
نوموړي زیاته کړې چې پېښه نن له غرمې مخکې ۹:۳۰ بجې هغه مهال رامنځته شوې چې یوه سراچه ډوله موټر د پلخمري ښار په «بُرقها» سیمه کې سیند ته پرېوت.
د بغلان د امنیې قومنداني ویاند همداراز ویلي چې دې پېښه کې پنځو کسانو خپل ژوند بایللی او یو بل کس ټپي دی چې دا مهال روغتون کې تر درملنې لاندې دی.
د هغه په وینا، پېښه کې د ټپي شوي روغتیايي وضعیت د ډاډ وړ دی. په مړو شویو کې یو ماشوم، یوه ښځه او درې نارینه شامل دي. دا په داسې مهال دی چې په تېرو دوو ورځو کې بغلان کې د ټرافیکي پېښو له امله نږدې ۷۰ کسان مړه او ټپیان شوي دي.
سلاموطندار پر ټوېټرپاڼه هم وڅارئ
پرون هم د دغه ولایت په خنجان ولسوالي کې د یوه ۵۸۰ ډوله موټر د چپهکېدو له امله نهه کسان مړه او ۴۰ نور ټپیان شوي وو.
