د میدانوردګ مرکز میدانښار او یوشمېر لروپرتو ولسوالیو اوسېدونکي له حکومت او نړیوالو بنسټونو د بېړنیو مرستو غوښتنه کوي.
د سیداباد ولسوالي یوه اوسېدونکي اخترمحمد سلاموطندار ته وویل، د وروستیو اورښتونو سېلابونو له امله دغه ولسوالي کې سلګونه کورنۍ بېړنو مرستو ته اړتیا لري او له حکومت او نړیوالو بنسټونو د بېړنو مرستو غوښتنه کوي.
د سلاموطندار پښتو فېسبوکپاڼه وڅارئ
هغه وایي، د وروستیو اورښتونو او د یخ سړې څپې له امله د کوچیانو سلګونه څاروي سټ شوي دي.
د نرخ ولسوالي یوه اوسېدونکي شفیقالله سلاموطندار ته وايي، په نرخ، چک، جغتو او دایمیرداد ولسوالیو کې د وروستیو اورښتونو له امله لسګونه د هستوګنې کورونه نړېدلي او خلکو ته درانه مالي او ځاني زیانونه اوښتي دي.
نوموړی زیاتوي چې حکومت باید د وروستیو اورښتونو او سېلابونو له امله د اوښتو زیانونو په اړه سروې وکړي او له زیانمنو شویو کورنیو سره بېړنې مرستې وکړي.
همدارنګه د میدانوردګ د طبیعي پېښو پروړاندې مبارزې ریاست رییس فیضالله جلالي وايي چې د دغه ولایت د والي د هدایت له مخې، د اورښتونو او سېلابونو له امله شاوخوا سل کورنیو سره بېړنې مرستې شوي او هڅې روانې دې چې د کورنیو او نړیوالو بنسټونو په مرسته پاتې زیانمنو شویو کورنیو سره هم مرستې وشي.
باید وویل شي چې د اورښتونو او سېلابونو له امله د دغه ولایت شاوخوا پنځه کسان مړه شوي او دوه نور ژوبل شوي دي.
