لېبیا کې د سختو توپانونو له امله په راوتلیو سېلابونو کې زرګونه کسان مړه شوي او شاوخوا ۱۰زره کسان لاهم نادرکه دي.
د لېبیا په ختیځ ساحلي ښار درنا کې چارواکي وايي چې تراوسه د سېلابونو له امله دغه ښار کې ۲۲۰۰ کسان مړه شوي او د ښار نږدې ټوله برخه ویجاړه شوې ده.
د لېبیا ځینو ټلویزیوني شبکو دغه ښار کې د مړو شمېر شاوخوا ۵۰۰۰ ښودلی دی.
رویټرز خبري اژانس د درنا ښار د یوه روغتیايي چارواکي په حواله راپور ورکړی چې د یاد ښار په دوو ولسوالیو کې سېلابونو ۱۷۰۰ کسان مړه کړي او ۵۰۰ نور هم په یوې بله ولسوالي کې د سېلابونو ښکار ګرځېدلې دي.
پر ټولنیزو رسنیو خپورو شویو ویډیوګانو او تصویرونو کې ښودل کېږي چې جسدونو ته ډلهییز قبرونه کیندل شوي دي.
د لېبیا نور ختیځ ښارونه له هغې ډلې بنغازي هم سېلابونو ویجاړ کړی دی. په همدې حال کې د سره صلیب نړیوالې ټولنې ویلي چې د مړو شویو کسانو شمېر ښايي له دې هم پورته شي.
د سره صلیب نړیوال فدراسیون او سرې میاشتې ټولنې یوه غړي تامر رمضان په یوه ویډیويي پیغام کې خبریالانو ته ویلي: «موږ کولای شو چې د خپلو اطلاعاتو سرچینو څخه دا تایید کړو چې د ورکو شویو کسانو شمېر تراوسه ۱۰زره کسانو ته رسېدلی دی.»
د ملګروملتونو د بشردوستانه چارو د همغږۍ دفتر یا اوچا ویلي چې ځپل شویو سیمو کې د مرستو رسولو لپاره بېړنۍ ډلې رسېدلې دي.
سلاموطندار پر ټویټر هم وڅارئ
د ترکیې ترڅنګ یوشمېر نورو هېوادونو هم دغه هېواد ته مرستې لېږلې، خو یاد هېواد کې د سیاسي کړکېچ له امله د مرستو رسولو بهیر ټکنی شوی دی.