د ټرانسپورټ او هوايي چلند وزارت د هوا پېژندنې ریاست نن او سبا په ټول هېواد کې د درنو اورښتونو او له امله یې د سېلابونو د راوتلو اټکل کړی دی.
د هوا پېژندنې ریاست په یوې خبرپاڼه کې ویلي چې نن او سبا د کابل په ګډون، ننګرهار، کندهار، پکتیا، لغمان، روزګان، کونړ، بدخشان، هرات، هلمند، بامیان او ټولو ولایتونو کې بارانونه، واوره او له امله یې د سختو سېلابونو د راوتلو اټکل شوی دی.
د سلاموطندار پښتو فېسبوکپاڼه وڅارئ
په خبرپاڼه کې همداراز ویل شوي چې یادو ولایتونو کې د اورښتونو کچه له ۱۵ تر ۶۰ ملي مترو او د واورې کچه له ۱۵ تر ۴۰ سانتي مترو اټکل شوې.
د ټرانسپورټ او هوايي چلند وزارت د هوا پېژندنې ریاست داسې مهال د هېواد په ځینو ولایتونو کې د اورښتونو اټکل کوي چې د کابل په ګډون په یوشمېر ولایتونو کې له تېرې ورځې راهیسې د اورښتونو لړۍ پیل شوې.
نن شنبه، وري ۲۵مه کابل او یوشمېر ولایتونو کې بارانونه روان دي چې ځینو سیمو کې د سېلابونو راوتلو له امله لارې هم تړل شوې دي.
د پروان محلي مسوولانو سلاموطندار ته ویلي چې د دغه ولایت او بامیان لویه لاره د سېلابونو راوتلو له امله بېګاه راهیسې تړل شوې وه چې نن بېرته پرانېستل شوه.
له دې سربېره د هېواد په ځینو نورو سیمو کې هم د سېلابونو د راوتلو خبر ورکړل شوی دی.