د افغانستان برښنا شرکت وايي چې افغانستان ته له ترکمنستانه د راغلې برښنا قرارداد د ۲۰۲۳ کال تر پایه نوی شوی دی.
د دغه شرکت په وینا، له ترکمنستانه د راغلې برښنا قرارداد نن دوشنبه د دغه هېواد په پلازمېنې عشقاباد کې لاسلیک شوی دی.
د سلاموطندار پښتو فېسبوکپاڼه وڅارئ
د افغانستان برښنا شرکت تر دې مخکې له ازبکستان او تاجکستان سره هم د وارداتي برښنا قرارداد نوی کړی، خو ازبکستان له څو ورځو راهیسې پر افغانستان برښنا پرې کړې ده.
افغانان، په تېره د پلازمېنې کابل اوسېدونکي د برښنا له نشتوالي شکایت کوي او وايي، په څلېرویشت ساعتونو کې یوازې یو ساعت برښنا لري.
د بهرنیو چارو وزارت سرپرست امیرخان متقي پرون په یوه غونډه کې پر ازبکستان نیوکه وکړه چې پر افغانستان یې برښنا پرې کړې ده.
هغه له ازبکستاني چارواکو وغوښتل چې د قرارداد له مخې، افغانستان ته برښنا را خوشې کړي.
