د چین په مرکزي او ختیځو سیمو کې د روان ژمي سړو څپو ټرافیکي سېسټم له خنډ سره مخ کړی او په سلګونه اورګاډي درول شوې دي.
چینایان چې تازه د نوي کال لپاره چمتووالی نیسي، د دغه هېواد ځینو برخو کې د سړې هوا له امله سړکونه او د اوسپنې پټلۍ کنګل شوي دي.
د سلاموطندار پښتو فېسبوکپاڼه وڅارئ
چین کې ګڼشمېر کسان د پسرلنیو رخصتو پر مهال خپلو کورونو ته سفر کوي چې د دغه هېواد ځینو سیمو کې سړو څپو د یادو کسانو سفر له ستونزو سره مخ کړی دی.
د دغه هېواد هونان او هوبي هغه ولایتونه دي چې د ژمي د تر ټولو سړه څپه ترې تېرېږي او له امله یې پر لویو لارو ټرافیک کم شوی او د سلګونه اورګاډو د درېدو لامل شوې ده.
په ورته مهال دې سړې څپې د میلیونونو هغو کسانو راتګ هم ننګولی چې د چین د نوي کال نمانځنې لپاره له بهر څخه دغه ته راځي.
چین کې رسنیو خبر ورکړی چې د ګڼشمېر اورګاډو تګ ځنډول شوی او یا هم تړل شوي چې له کبله یې د اورګاډو تمځایونو کې د مسافرو ګڼهګوڼه ډېره او سرخوږی ورته جوړ شوی.
د ځینو رسنیو د راپورونو له مخې، د دغه هېواد په لسو ولایتونو کې شاوخوا ۱۲۹ لویې لارې د سړې هوا او کنګل له امله تړل شوې دي.
د چین بېړني ملي اژنس په دغه هېواد کې د راتلونکو ورځو پر مهال د هوا د سړښت خبر هم ورکړی چې او څو ښارونو ته یې سپارښتنه کړې چې خپل چمتووالی ونیسي.