چین کې د ټسلا موټر جوړولو کمپنۍ څانګې دغه هېواد کې خپل پلورل شوي ۱.۶ میلیونه برښنايي موټر د ځینو ستونزو له کبله بېرته دې کمپنۍ ته ورغوښتي دي.
د موټر جوړونې دې کمپنۍ خپل پلورل شوي «اېس، وای، درې او اېکس ماډل» موټر له دې کبله ورغوښتي چې د یادو موټرو اتومات سېسټم او د دروازو بندېدو کنټرول برخه کې ستونزې پیدا شوي دي.
سلاموطندار پر فېسبوک وڅارئ
د چین بازار د کنټرول دولتي ادارې «SAMR» جمعه جنورۍ پنځمه دغه اعلان کړی او ویلي یې دي چې پکېنګ او شانګهای کې به ټسلا شرکت د دې ستونزې هواري لپاره له لرې لارې د کنټرول سېسټم نوی کړي.
همداراز د پلورل شویو موټرو د بېرته ورغوښتلو په بهیر کې زرګونه هغه موټر هم شامل دي چې د ټسلا له نورو څانګو چین ته وړل شوې دي.
د چین بازار د ټسلا موټر جوړولو شرکت لپاره تر ټولو ګټور او د پام وړ بازار شمېرل کېږي چې د یاد شرکت مالک د امریکا او چین ترمنځ د اړیکو له ترینګلتیا سره-سره د یاد هېواد له چارواکو سره نږدې اړیکې ساتلې دي.
سلاموطندار پر اېکس هم وڅارئ
د چین دولتي خبري اژانس شېنوها د روانې اوونۍ په پیل کې راپور ورکړی چې د ټسلا شانګهای څانګې ۲۰۲۳ کال کې ۹۴۷۰۰۰ موټر تولید کړې دي.