د سوریې د بهرنیو چارو وزارت له امریکا غوښتنه کړې چې دغه هېواد کې له ترهګرو او بېلتون غوښتونکو څخه له خپل ملاتړه لاس په سر شي.
د سوریې د بهرنیو چارو وزارت په یوې ویناپاڼه کې ویلي چې دغه هېواد له امریکا غواړي چې د ترهګرو او بېلتون غوښتونکو ډلو ملاتړ پرېږدي او له سوریې څخه دې ژر تر ژره ووځي.
د سوریې د بهرنیو چارو وزارت د ویناپاڼې پر بنسټ، امریکايي ځواکونه چې یاد هېواد کې په ناقانونه توګه حضور لري، په وروستیو اوونیو کې یې له دغه هېواده د نفتو صادراتو ته دوام ورکړی دی.
په ورته مهال په خبرپاڼه کې ټينګار شوی چې امریکا دې د سوریې خلکو ته د اوښتو زیانونو غرامت هم ورکړي.
په ویناپاڼه کې راغلي: «سوریه همداراز د امریکا له متحده ایالاتو غواړي چې له ترهګرو او بېلتون غوښتونکو ډلو خپل ملاتړ پرېږدي او ژر تر ژره د سوریې له اشغال شویو سیمو ووځي.»
سلاموطندار پر ټویټر هم وڅارئ
څه باندې یوه لسیزه کېږي چې سوریه کې کورنۍ جګړه روانه ده او دغه هېواد د امریکا، روسیې او ایران د جګړې پر ډګر بدل شوی دی.
