د کورنیو چارو وزارت ویاند عبدالنافع ټکور پر خپله ټوېټرپاڼه لیکلي چې د کابل د دویمې امنیتي حوزې اړوند ملک اضغر څلور لارې کې د پولیسو چکپواینټ ته نږدې یو ځانمرګی بریدګر موخې ته له رسېدو مخکې د امنیتي ځواکونو له لوري په نښه او وژل شوی دی.
پېښه نن دوشنبه د وري اوومه له غرمې وروسته رامنځته شوې ده. یاده سیمه د بهرنیو چارو وزارت ته په څو قدمۍ کې پرته ده.
ویل کېږي چې بریدګر پورې د تړلو چاودېدونکو توکو د چاودنې په پایله کې شپږ ملکیان وژل شوي او د اسلامي امارت د درېوو سرتېرو په ګډون یوشمېر ملکیان ټپیان دي.
د کورنیو چارو وزارت په دې اړه نور جزیات نه دي ورکړي، خو زیاته کړې یې ده چې د پېښې په تړاو به نور معلومات وروسته له رسنیو سره شریک کړي.
د کابل د امنیې قومنداني ویاند خالد ځدراڼ هم پېښه تایید کړې او ویلي یې دې چې پېښه کې شپږ کسان وژل شوي او یوشمېر ټپیان دي.
هغه ویلي، د بريدګر د وژل کېدو پايله کې هغه سره چاودېدونکو توکو هم چاودنه کړې چې له امله یې تر ۶ پورې ملکيان وژل شوي او یوشمیر ټپیان دي.
د یادونې وړ ده چې له دې وړاندې هم د بهرنیو چارو وزارت مخې ته د یوه ځانمرګي برید له امله یوشمېر کسان وژل شوي او ټپیان شوي وو.
سلاموطندار پر ټویټر هم وڅارئ
تراوسه د یاد برید مسوولیت کوم چا یا ډلې پر غاړه نه دی اخیستی.
