د پاکستان د بلوچستان ایالت په اړوند سیمه کې د پولیسو پر موټر د ځانمرګي برید له کبله نهه پولیس سرتیري وژل شوي او ۱۳ نور ټپیان دي.
برید نن دوشنبه د کب ۱۵مه د بلوچستان ایالت د کچي ولسوالي کنبري پُل سره نږدې شوی دی. په ورته مهال پاکستاني رسنیو راپور ورکړی چې ښايي د مرګژوبلې شمېرې له دې هم لوړې شي.
په همدې حال د پاکستان د کورنیو چارو وزیر اسلاماباد کې یوې غونډې ته ویلي، برید هغه مهال شوی چې یاد سرتیري د کوټې ښار پر لور روان وو.
تراوسه د برید مسوولیت کوم چا یا ډلې پر غاړه نه دی اخیستی، خو له دې وړاندې دغه ایالت کې د ډېری شویو بریدونو مسوولیت بلوڅ بېلتونغوښتونکو او ټيټيپي منلی دی.
د پاکستاني رسنیو د راپورونو له مخې، د روان ۲۰۲۳ کال د لومړیو دوو میاشتو پر مهال بلوچستان کې د بېلابېلو بریدونو پر مهال ۷۹ کسان وژل شوي چې ۵۹ یې نظامیان دي.
د خپورو شویو راپورونو پر بنسټ، په یادو بریدونو کې نږدې ۲۰ ملکیان هم وژل شوي دي.
سلاموطندار پر ټویټر هم وڅارئ
پاکستان کې د وروستیو سیاسي تحولاتو ترڅنګ دغه ولایت کې د پوځیانو او نظامي کسانو پر وړاندې د پاکستاني طا لبانو او نورو وسلهوالو ډلو بریدونه زیات شوي دي.
