د سریلانکا د کرېکټ ملي لوبډلې په خپل کوربهتوب د افغانستان کرېکټ ملي لوبډلې ته په یوازینۍ ټسټ سیالي کې په لسو وېکټو ماته ورکړه.
افغانستان په دې لوبه کې سریلانکا ته د ۵۶ منډو هدف ورکړی و چې سرلانکا لوبډلې د کوم لوبغاړي له سوځېدو پرته ورکړل شوی هدف ترلاسه او بریا یې خپله کړه.
د سلاموطندار پښتو فېسبوکپاڼه وڅارئ
افغان لوبډلې د یادې ټسټ لوبې د توپوهنې په لومړۍ پاڼۍ کې د ټولو لوبغاړو په سوځېدو ۱۹۸منډې جوړې کړې. ورپسې سریلانکا د انجلو مټیوز او ډنیېس چنډیمال د سلیزو پر مټ ۴۳۹ منډې جوړې کړې.
که څه هم د افغان لوبډلې د دویمې توپوهنې پیل ښه وو او ابراهیم ځدراڼ پهکې سلیزه هم ورکړه، خو ټولې لوبډلې یوازې ۲۹۶ جوړې کړې او سریلانکا ته یې د ۵۶ منډو هدف ورکړ.
د افغانستان لپاره په توپوهنه کې ابراهیم ځدراڼ ۱۱۴، رحمتشاه ۵۴ او نورعلي ځدراڼ هم ۴۷ منډې وکړې.
په توپاچوونه کې بیا د افغانستان لپاره نوید ځدراڼ څلور وېکټې ترلاسه کړې او د سریلانکا بیا پرابات جاسوریا په لومړۍ پاڼۍ درې او دویمه پاڼۍ کې پنځه وېکټې ترلاسه کړې.
افغانستان به له دې وروسته کوربه لوبډلې سره د درېوو یو ورځنیو او شل اووره سیالیو لوبلړۍ پیل کړي چې د یو ورځنۍ لوبلړۍ لپاره لوبډله هم اعلان شوې.