سرپل کې سرچینې سلاموطندار ته وايي چې نن غرمه د دغه ولایت د سانچارک او بلخاب ولسوالیو ترمنځ «قُمکوتل» سیمه کې د اسلامي امارت د هزاره قومندان مهدي مجاهد پورې تړلو کسانو او د اسلامي امارت د ځواکونو ترمنځ نښته شوې ده.
د سرچینې په وینا، په دغه نښته کې چې اوس هم روانه ده، د اسلامي امارت د ځواکونو او د مهدي مجاهد اړوند یوشمېر کسان وژل شوې دي.
د سلاموطندار پښتو فېسبوکپاڼه وڅارئ
په ورته مهال سرچینې زیاته کړې چې د اسلامي امارت ځواکونو د سانچارک ولسوالي «ابکلان» سیمه کې دوه دفاعي کرښې ماتې کړي او د مهدي مجاهد یوشمېر کسان یې نیولې دي.
سلاموطندار ته د سرچینې له لوري د ورکړل شویو معلوماتو له مخې، په بلخاب ولسوالي کې د مهدي مجاهد ځپلو لپاره د ۲۰۹ الفتح قول اردو او د جوزجان، فاریاب او سرپل ولایتونو له لواو څخه سلګونه تازه دمي سرتیري له درنو وسلو او پوځي تجهیزاتو سره دغه ولایت ته رسېدلي دي.
بلخوا ویل کېږي چې د دفاع وزارت یوشمېر چورلکې د ځمکني ځواکونو د ملاتړ په موخه دغه سرپل کې ځای پر ځای شوي دي. د سرپل محلي مسوولانو تراوسه په دې اړه رسنیو ته څه نه دي ویلي.
له دې وړاندې د اسلامي امارت او مهدي مجاهد ترمنځ په سرپل ولایت کې د خبرو څو پړاونه شوي، خو د سرچینو په وینا، بېپایلې پای ته رسېدلي دي.
په ورته مهال سرچینې د سهشنبې پر ورځ سلاموطندار ته ویلي وو چې د اسلامي امارت او مهدي مجاهد ترمنځ د خبرو تازه پړاو پیلېږي.
په همدې حال کې د سرپل ولایت د سانچارک او بلخاب ولسوالي یوشمېر اوسېدونکو سلاموطندار ته ویلي وو چې دغو ولسوالیو پوځي بڼه خپره کړې ده.
دوی همداراز ټينګار کړی و، که خبرې بېپایلې ورسېږي، د دواړو لوریو ترمنځ به خونړۍ نښته رامنځته شي.
