د شهزاده سرای د صرافانو ټولنې مسوولان وايي چې د تېرو څلورو میاشتو په پرتله، اوس له هېواده بهر د ډالرو قاچاق زیات شوی دی.
د دې ټولنې ویاند عبدالرحمان ځیرک نن سلاموطندار ته په دې اړه ویلي: «د تېرو څلور میاشتو په پرتله د ډالرو قاچاق زیات شوی او که مخه یې ونه نیول شي، د هېواد په بازارونو کې به د افغانۍ پر ارزښت او د خوراکي توکو د بیو پر لوړېدو اغېز وکړي.»
په همدې حال کې د کورنیو چارو وزارت ادعا کوي چې په تېر یوه کال کې یې له هېواده د ډالرو د قاچاق مخه نیولې ده.
د کورنیو چارو وزارت د ویاند مرستیال بسمالله حبیب وايي: «اسلامي امارت په تېر یوه کال کې له هېواده بهر د ډالرو د قاچاق مخه نیولې او هېچا ته اجازه نه ورکوي چې ډالر له هېواده قاچاق کړي.»
د حبیب په وینا، د اسلامي امارت پولهساتو ځواکونو په تېرو څو میاشتو کې یوشمېر هغه کسان نیولي چې غوښتل یې ډالر له هېواده بهر قاچاق کړي.
د سلاموطندار پښتو فېسبوکپاڼه وڅارئ
د یادونې ده چې د افغانستان ګاونډیو او نورو بهرنیو هېوادونو ته د ډالرو قاچاق هغه ستونزه ده چې له کلونو راهیسې ترې خلک، یوشمېر صرافان او حکومت سر ټکوي، خو لا یې هم د بشپړ مخنیوي لپاره لازم ګامونه نهدي اخیستل شوي.
