د پاسپورټ عمومي ریاست مسوولان وايي، سبا پنجشنبه به د پاسپورټونو پر اړوند ځینو ټولیزو موضوعاتو خبرې وشي. نن ماښام داسې خبرونه خپاره شول چې ګواکې سبا به د پاسپورټونو د وېش بهیر له اوږده ځنډ وروسته بیا پیل شي.
د سلاموطندار پښتو فېسبوکپاڼه وڅارئ
خو د پاسپورټ ریاست ویاند نورالله پتمن رسنیو ته ویلي چې سبا د پاسپورټونو د وېش بهیر نه پیلېږي، بلکې د پاسپورټونو اړوند پر ځینو ټولیزو موضوعاتو خبرې کېږي.
په همدې حال کې د کابل امنیې قومانداني ویاند خالد ځدران د پاسپورټ ریاست د خبري ناستې خبر ورکړی دی. هغه لیکلي چې د یاد ریاست مسوولان سبا د حکومت د رسنیو مرکز کې خبري ناسته لري.
د پاسپورټ عمومي ریاست څو میاشتې مخکې لومړی په ولایتونو کې او ورپسې یې په مرکز کې هم د پاسپورټونو د وېش بهیر وځنډوه.
دغه ریاست هغه مهال ویلي و چې د پاسپورټونو د پراسېس اړوند وسایل او ماشینونه یې له کاره لوېدلي او تر بیا جوړېدو پورې به یې د وېش بهیر ځنډېدلی وي.
بلهخوا یوشمېر کسانو څه موده مخکې سلاموطندار ته ویلي و چې په تور بازار کې د یوه پاسپورټ بیه ۳۰۰۰ ډالره ده، خو مسوولانو بیا یاد پاسپورټونه جعلي بللي وو.
دا په داسې حال کې ده چې خلکو تل د پاسپورټونو د وېش بهیر پر ځنډ او د پاسپورټ ریاست کې پر کمېشنکارۍ نیوکې کوي او وايي، یاد ریاست دې د پاسپورټونو د وېش بهیر پیل او د فساد مخه دې هم ونیسي.
