د نیوزیلنډ کرېکټ ملي لوبډلې په خپل کوربهتوب د پنځو شل اووره سیالیو د لوبلړۍ په لومړۍ لوبه کې پاکستان د ۴۶ منډو په توپیر له ماتې سره مخ کړ.
د نیوزیلنډ لوبډلې د لوبډلمشر کېن ویلیامسن او ډارېل مېچل د نیمه سلیزو پر مټ ټاکل شویو ۲۰ اورونو کې پاکستان ته د ۲۲۷ منډو هدف ورکړی و چې پاکستان یوازې ۱۸۰ منډې جوړې کړې.
د سلاموطندار پښتو فېسبوکپاڼه وڅارئ
د نیوزیلنډ لپاره په توپوهنه کې ډاریل مېچل ۶۱ او کېن ویلیامسن ۵۷ منډې وکړې. په توپاچوونه کې بیا شاهین شاه افریدي د پاکستان لپاره څلور اورونو کې ۴۶ منډې ورکړې او درې وېکټې یې ترلاسه کړې.
پاکستان د نیوزیلنډ د ورکړل شوي هدف په ځواب کې له ټاکل شویو ۲۰ اورونو څخه ۱۸ اورونه ولوبول او ۱۸۰ منډو کې یې خپل ټول لوبغاړي له لاسه ورکړل.
د پاکستان لپاره تر ټولو ډېرې منډې بابر اعظم ۵۷ او سېم ایوب ۲۷ منډې وکړې. یاده سیالي د نیوزیلنډ د اُکلنډ په اېډن پارک لوبغالي کې ترسره شوه.
د دواړو لوبډلو ترمنځ به دویمه او راتلونکې سیالي د جنورۍ پر ۱۴مه د یکشنبې پر ورځ وشي.