د هوا په سړېدو سره یوشمېر کابل ښاریان د برښنا پرچاوۍ او د سونتوکو د لوړې بیې په اړه شکایت کوي او وايي، له یوې خوا یې کورونه تیاره دي او بلهخوا یې د تودولو لپاره سونتوکي نه لري.
د کابل ښار اوسېدونکی روحالله د برښنا پرچاوۍ له کبله پر برښنا شرکت نیوکه کوي او وايي، په درې څلورو ورځو کې یوازې دوهدرې ساعته برښنا لري. هغه سلاموطندار ته ویلي، لرګي او د ډبرو سکاره نه لري او همدا لامل دی چې د برښنا پرچاوۍ یې ژوند سخت کړی دی.
د کابل یو بل اوسېدونکی حمید بیا په ښار کې د سونتوکو د لوړې بیې په اړه شکایت کوي او وايي، د کورونو تودولو لپاره د یادو توکو د پېرلو وسه نه لري او د برښنا پرچاوۍ یې ستونزې دوهبرابره کړې دي.
کابل کې د یوې مطبعې مسوول فریدون چې د خپلو ورځنیو چارو د پر مخ وړلو لپاره دوامداره برښنا ته اړتیا لري، هم شکایت کوي چې د برښنا پرچاوۍ یې چارې ټکنۍ کړې دي.
په همدې حال کې د افغانستان برښنا شرکت بېګاه د خبرپاڼې په خپرولو سره هېواد ته له ازبکستان څخه د راغلې برښنا د پرې کېدو خبر ورکړ.
د دغه ریاست په وینا، ازبکستان کې د تخنیکي ستونزو له کبله برښنا پرې شوې ده. دوی که څه هم د دې ستونزې د ژر حل خبر ورکړ، خو خلک شکایت کوي چې تر دې مخکې یې هم په برښنا دمه نهده جوړه شوې.
د سلاموطندار پښتو فېسبوکپاڼه وڅارئ
دا لومړی ځل نهدی چې کابل ښاریان او نور هېوادوال د برښنا پرچاوۍ او د سونتوکو له لوړې بیې شکایت کوي، بلکې هر کال د هوا په سړېدو سره برښنا او سونتوکو ته د خلکو لاسرسی کمېږي.
