د ژغورنې نړیوالې کمېتې (IRC) له انساني ناورین سره د مخ شلو هېوادونو په اړه یوه راپور کې لیکلي چې افغانستان له سوماليا او ایتوپیا وروسته، درېیم هېواد دی چې له دغه ناورین سره مخامخ دی.
که څه هم افغانستان ته د نړیوالې ټولنې نږدې دوه میلیارډه ډالره مرستې راغلي، خو لا هم د نړۍ درېیم بېوزله هېواد دی چې له انساني ناورین سره مخامخ دی.
د سلاموطندار پښتو فېسبوکپاڼه وڅارئ
په همدې حال کې د اقتصادي چارو شنونکی بهیر ځلاند وايي، له افغانستان سره د نړیوالې ټولنې مرستې د افغانانو اقتصادي ناورین نهشي حل کولای او پهکار ده چې د دغه وضعیت د کنټرول لپاره اوږدمهالې اقتصادي طرحې جوړې شي.
د هغه په وینا، یادې مرستې د ورځنیو اړتیاوو د پوره کېدو لپاره دي او د افغانستان د پر ځان بسیاینې او اقتصادي پرمختګ لپاره ګټورې نه تمامېږي.
په همدې حال کې د نړیوال سیاسي اقتصاد شنونکی نظیراحمد رزاقي وايي چې په نړیوالې ټولنې د افغانستان د اقتصاد تړل کېدل او اقتصادي زېربناوو ته نه پام لامل شوی چې لا هم په افغانستان کې د بېوزلۍ کچه لوړه پاتې شي.
نوموړی زیاتوي، د نړیوالې ټولنې مرستې په اوږدمهال کې د افغانانو اوسنۍ بېوزلۍ ته د پای ټکی نهشي کېښودای.
بلهخوا د اسلامي امارت د ویاند مرستیال بلال کریمي که څه م مني چې هېواد کې اقتصادي ستونزې شته، خو ټینګار کوي چې د نړیوالې ټولنې اندېښنې او د ژغورنې نړیوالې کمېټې شمېرې د افغانستان له واقعیتونو سره برابرې دي.
هغه وايي، هېواد کې د څه باندې څلور لسیزو جګړه، وچکالي او کورونا د افغانانو د بېوزلۍ لامل شوي، خو په خبره یې، اسلامي امارت پر داسې پروژو کار کوي چې ګڼشمېر خلکو ته به پهکې د کار اسانتیاوې برابرې شي.
د یادونې ده چې افغانستان کې د اسلامي جمهوري نظامي په ړنګېدو سره د هېواد اقتصادي بنسټونه هم له منځه لاړل او د نړیوالې ټولنې مرستو هم افغانان له اقتصادي ناورین څخه نهدي ژغورلي.
