اوزبکستان له څو ورځو راهیسې په دغه هېواد کې د برښنا کموالي له کبله افغانستان ته خپله صادراتي برښنا ۶۶ سلنه کمه کړې چې له کبله یې د کابل په ګډون، د ۱۲ ولایتونو برښنا کمه شوې ده.
خو د افغانستان برښنا شرکت مسوولان وايي چې خلک دې د برښنا کمېدو ستونزې تر حل پورې د برښنا پرچاوي وزغمي.
د سلاموطندار پښتو فېسبوکپاڼه وڅارئ
د برښنا شرکت ویاند حکمتالله میوندی وايي: «په پلازمېنې او یوولس ولایتونو کې د برښنا پرچاوۍ کمېدو لپاره مو د ترهخېلو حرارتي برښنا دستګاه پرانېستې. له خلکو غواړو چې د برښنا کمېدو ستونزې تر حل پورې نور زغم هم ولري.»
په همدې حال کې یوشمېر کابل ښاریان وايي چې د برښنا پرچاوۍ یې کاروبار ته زیان اړولی دی.
د کابل اوسېدونکی غلامسخي وايي: «زه د جامو مینځلو هټۍ لرم، خو برښنا نشته، اړ یم چې تېل وپېرم او جنراټور ولګوم چې دا په لوړه بیا راته تمامېږي.»
د کابل یو بل اوسېدونکی نوید صدیقي چې په یوه خصوصي شرکت کې کار کوي وايي، د برښنا نشتوالي یې پر کاروبار منفي اغېز کړی دی.
هغه زیاتوي: «په کور کې هم برښنا نه لرم او دفتر کې هم نشته. زموږ دفتر ډېر انټرنېټ ته اړتیا لري او که برښنا نه وي، کاروبار مو مخې ته نه ځي.»
د افغانستان برښنا شرکت د مسوولانو په وینا، اوس چې د پلازمېنې او یوولسو ولایتونو اوسېدونکي د برښنا له کمښت سره مخامخ شوي، دوه ساعته برښنا د ورځې او دوه ساعته هم د شپې ور خوشې کوي؛ خو خلک بیا شکایت کوي چې په څلېرویشت ساعتونو کې یوازې څلور ساعته برښنا بسنه نه کوي.
