پاکستاني رسنیو نن دوشنبه د لړم نهمه راپور ورکړی چې د دغه هېواد په ګوجرانواله کې د صدف نعیم په نوم یوه خبریاله د لاریون پرمهال د عمرانخان د لارۍ موټر لاندې شوې او مړه شوې ده.
رسنیو ویلي، صدف نعیم هڅه کوله دغې لارۍ ته وخېژي او د پاکستان له مخکیني لومړي وزیر عمرانخان سره مرکه وکړي، خو لارۍ ته د ختلو پرمهال رالوېدلې او سر یې د لارۍ د ټایر لاندې شوی دی.
صدف نعیم د ۵ خبري چینل لپاره د خبریالې په توګه کار کاوه. مخکیني لومړي وزیر عمرانخان په یادې پېښې خواشیني ښودلې او په وینا یې، د صدف نعیم مړینې ټکان ورکړی دی.
عمرانخان د یادې خبریالې له مړینې وروسته د اسلاماباد پر لور خپل لاریون هم ځنډولی دی.
د پاکستان مخکینی لومړی وزیر عمرانخان د پاکستان په فدرالي حکومت فشار راوړي، څو له ټاکلې نېټې مخکې دغه هېواد کې ټاکنې وکړي، خو اوسنی حکومت وايي چې انتخاباب به پر خپل کېږي.
عمرانخان د روانې اکتوبر میاشتې په ۲۸مه له لاهور څخه پراخ لاریون پیل کړ او ټاکل شوې چې د جمعې پر ورځ اسلام آباد ته ورسېږي. بلخوا اوسني حکومت ویلي چې اسلاماباد ته د عمرانخان او د نوموړي په پلوۍ د لاریون کوونکو د راننوتو مخه به نیسي.
سلاموطندار پر ټویټر هم وڅارئ
د پاکستان حکومت زیاته کړې چې په اسلام اباد کې یې سخت امنیتي تدابیر نیولي او په لویو لارو کې یې په سلګونو کانټینرونه د لاریون کوونکو او په حکومتي دفترونو د هغوی د بریدونو د مخنیوي لپاره ځای پر ځای کړي دي.
