د امام ابوحنیفه نړیوال نندارتون نن د یوشمېر کورنیو او بهرنیو سوداګرو او پانګوالو په حضور سره کابل کې پرانېستل شو چې اووه ورځې به دوام وکړي.
دغه نندارتون کې د سیمې هېوادونو یوشمېر سوداګرو او پانګوالو هم ګډون کړی، څو د افغان ښځو لاسي صنایعو او د افغانستان محصولاتو سره بلدتیا پیدا کړي.
د سوداګرۍ او پانګونې خونې مرستیال یونس مومند وايي، دغه نندارتون وطني محصولانو او د افغان ښځو لاسي صنایعو ته د بازار موندنې په هدف جوړ شوی دی.
نوموړي وویل چې دغه نندارتون کې د بېلابېلو برخو څه باندې ۶۰۰ شرکتونو استازیو ګډون کړی دی.
د یاد نندارتون یوه ګډونواله حبیبه جبارخېل چې په خپل لاس چمتو کړي خواړه یې نندارې ته اېښي، وايي چې هیله لري خپل چمتو کړي خواړه د دغه نندارتون له لارې وپلوري.
نوموړې وویل: «د کورنۍ سرپرست نهلرم او د خپلې کورنۍ د اړتیا برابرولو لپاره مې خواړه پخ کړي او دلته مې راوړي، څو یې وپلورم.»
په همدې حال کې د سوداګرۍ او صنعت وزارت سرپرست نورالدین عزیزي له خلکو غواړي چې د هېواد د اقتصادي ودې لپاره کورنیو محصولاتو څخه ګټه پورته کړي.
د نوموړي په وینا، د وطني محصولاتو د استفادې لپاره به کور په کور، جومات په جومات او کلیو کې یو کمپاین پیل کړي، څو خلک د وطني محصولاتو څخه استفادې ته وهڅول شي.
له دې سره د اسلامي امارت رهبر هبتالله اخندزاده یوه غږیز پیغام کې له هغو سوداګرو چې هېواد څخه بهر اوسي، وغوښتل چې د هېواد ځان بسیاینې لپاره بیرته را وګرځي او پانګونه وکړي.
سلاموطندار پر ټوېټرپاڼه هم وڅارئ
د سوداګرۍ او پانګونې خونې مسوولان زیاتوي چې دغه نندارتون کې څه باندې ۵۶۵ غرفو کې بېلا بېل ډوله محصوولات او توکي نندارې ته اېښودل شوي چې ۱۰۷ هغه یې د ښځو لپاره ځانګړي شوي دي.
